Esta función conta con interpretes de Lingua de Signos.

Xira Despedida do multipremiado espectáculo Elisa e Marcela da compañía teatral A Panadaría nun

espazo singular, a Granxa Maruxa. Este espectáculo é, en palabras da crítica: “Un canto ao amor valente

e, ao tempo, unha homenaxe e unha reivindicación”.

Ano 1901, A Coruña. Dúas mulleres casan na Igrexa de San Xurxo, unha delas vestida de home.

Unha historia de persecucións policiais, fuxidas en dilixencia, cambios de identidade e informacións

manipuladas.

As cómicas de A Panadaría presentan unha reconstrución irreverente dun suceso real. Unha comedia

musical onde o verídico parece invento.

Elisa e Marcela é unha historia de amor a contratempo.

Granxa Maruxa é unha granxa ecolóxica de vacas situada na comarca da Ulloa, en Lugo. A súa

coordinadora, Marta Álvarez, reinventouse unha e outra vez e na actualidade desenvolve dous proxectos

xunto con outras cooperativas, os cosméticos naturais Muuhlloa! e a produción de leite e iogures Sen

Máis. Sede orixinaria do Agrocuir, a Granxa Maruxa é a capital rural galega do Orgullo e unha

localización moi especial para unha das últimas funcións de Elisa e Marcela.